ӨРХ БҮР САЛХИН СЭНС ХИЙЖ ӨВӨӨ НАРЫГ АЖИЛТАЙ БАЙЛГАЯ

Хотын утаа арай дэндлээ. Ер нь бол дайн болсон ч арай ч ийм их утаанд байхгүй дээ.

Энэ өвлийн утаа урьд жилийнхээс улам бүр ихэссэн байна. Их хотын иргэд бид цэвэр агаарынхаа төлөө хүн бүр чадах ядхаараа хувь нэмэрээ оруулах ёстой. Бидний хувь нэмэр агаарт утаа хаялгүйгээр дулаан өвөлжихөд чиглэгдэх хэрэгтэй.

Өнөөдөр цагт 2,5-5кВт цагт цахилгаан эрчим хүч хэрэглэдэг цахилгаан халаагуур хэрэглэхэд гэрээ овоо хөөрхөн дулаахан болгочихно. Гэвч дулаан өвөлжихөд энэ хангалттай биш. Дулаан орчныг бүрдүүлэхэд багагүй хэмжээний цахилгаан шаардлагатай. Харин энэ цахилгааныг өөрсдөө үйлдвэрлэж болно. Ингэснээр  бид асар их мөнгө хэмнэнэ.

Хотынхоо агаарыг цэвэр болгохын төлөө айл бүхэн гэртээ салхин сэнсний цахилгаан үүсгүүр хийх боломжтой. Гэр хорооллыхон маань яаж ийж байгаад хямд төсөр олдоцтой материалаар салхин сэнс хийчих  боломж уг нь бий. Дулаан бөгөөд цэвэрхэн өвөлжие гэвэл үүнийг оролдоод үзэх л хэрэгтэй. Гагцхүү та бидний техник бүтээлч сэтгэлгээ л энд хамгаас чухал. Хийж бүтээх гэж оролдохын хэрээр таны сэтгэлгээ, чадвар хөгжинө. Алийн болгон бид бусдыг харж суухав, бүгдээрээ бүтээлчээр сэтгэж, шинэ санаагаа туршъя л даа.

Сэргээгдэх эрчим хүч сонирхдогийн хувьд интернэтээр зөндөө шинэ санаа технологи хайх юм. Хайж явсаар зөндөө л хөөрхөн санаа оллоо. Мэдээллээ англи хэлээр зөв л хайж чадах юм бол интернэтэд хүссэн мэдээлэл маань бүгд л байна. Муухан багшаар дутуу дулимаг хичээл заалгаснаас илүү ихийг мэдэж болно.

Ер нь Америк, Орос болоод Европын шинжлэх ухаан техник хөгжсөн орнуудад тэтгэврийн өвөө нар гараашиндаа өөрсдөө цахилгаан үүсгүүр хийгээд л боломжийн л амьдардаг юм байна. Тэд тэтгэврийнхээ хэдэн цаасыг хэрэгтэй ганц хоёр багаж төхөөрөмж авахад л зарцуулдаг. Сайн багаж хэрэгсэлтэй болсон тэд хүссэн туршилтаа хийж, нарны болон салхин сэнс гэх мэт цахилгаан үүсгүүр хийгээд авдаг. Үүний дараа асар их хэмнэлт гардаг аж.

Тэгвэл эдгээр "гадаад өвөө" нар яагаад биднээс илүү байна вэ? Учир нь тэд шинжлэх ухаан, техник технологийн ач тусыг маш сайн мэддэг бас хүндэлдэг учраас тэр. Тиймдээ ч Засгийн газар нь шинжлэх ухааны салбарыг маш ихээр дэмждэг. Гэтэл манай хөгшчүүд дөнгөж 60 хүрэв үү үгүй үү “ядарсан хөгшин” гээд л юү юүгүй л бусдар өрөвдүүлж асаруулахыг урьтал болгодог.  Мэдээж тэд хөөрхий минь нас ахиад ядарч байгаа нь үнэн, гэхдээ хүн сэтгэлээрээ түрүүлээд өтлөх юм бол бүр ч хурдан жинхэнээрээ өтөлсөөр яваад өгнө.

Дээр дурьдсан гадаадын хөгшчүүд 70-80 гарчихаад өөрсдөө салхин сэнс, нарны цахилгаан хураагуур хийж цагийг зугаатай өнгөрүүлж сууна. Өөрийнхөө хөгшчүүдийг муулж байгаа юм биш, бид сэтгэлээрээ жаахан өөдрөг байж бүтээлч сэтгэлгээтэй байцгаая л гэх гэсэн юм. Хэрэв хөгшчүүд маань сэтгэлээрээ амархан өтөлж, дунд үе маань өөрсдөдөө итгэхгүй юм бол залуу үеийнхэнд үлгэрлэх, хүмүүжүүлэх тухай ярих ч хэрэггүй.

Тиймээс одооноос эхлэн бүгд бусдыг хүлээх биш өөрсдөө чадах зүйлээсээ шууд эхлэх хэрэгтэй. Аливаа зүйлийг эхлэх хэцүү ч эхэлсэн хойно бүх зүйл эрчээрээ урагшилдаг тул итгэлтэйгээр хийж бүтээж эхэлвэл бид бохир агаар, эдийн засгийн хямралаас амархаан гарчихна. Тиймээс яг одоо өрх бүр гэр гэртээ салхин сэнс хийж, агаараа бохирдуулахаа больё гэж уриалж байна.

Одоо та бүхэндээ гэрийн нөхцөлд хэрхэн салхины эрчим хүчээр цахилгаан үйлдвэрлэх төхөөрөмж хийх талаар зөвлөгөө өгье. Бүгд гарын доорх материалаар хийх тул олдоц сайтай.

Бидний хийх салхин сэнс маань 1-3кВт цахилгаан эрчим хүч гаргаж байхад хэр барагийн цахилгаан халаагуурыг ажиллуулж дөнгөнө.

Зарчимын хувьд хэвтээ тэнхлэгт сэнснээс илүүтэйгээр босоо тэнхлэгтэй нь ашигт үйлийн коэффициент сайн байдаг. Хөнгөн материалаар хийсэн тохиолдолд 1 метр/сек салхинд ч эргэж байдаг.

Хэрэглэх зүйлс:

1. Унадаг дугуйны обуд (3ш дугуйны гол)
2. Хуванцар хоолой (2 метр урт, 7,5-10 см диаметр голчтой
3. Эрэг шураг, боолт (тохирохыг нь)
4. Сэнсний суурь хийх хатуу хавтан(нимгэн банз)
5. Сэнсний далавч хийх хавтгай нимгэн банз(хуванцар байвал сайн)

Хуванцар хоолойг хөндлөнгөөр нь 2 хувааж, хооронд нь 50 см хэмжээтэй тайрна. Сэнсний далавчийг онгоцны далавчны хэвтээ огтлолтой адил хийхийн тулд ийнхүү тайрч байгаа хэрэг юм. Тайрсан тал хуванцар хоолойнуудаа хавтгай банзны ирмэгт зурагт үзүүлсний дагуу шүрүүптэж бэхэлнэ. Түүнийгээ дугуйны голд тэнцүү хувиарлан зурагт үзүүлсний дагуу нэг чигийн урсгалтайгаар бэхэлж дахин нэг үе солбиулан сэнсээ бэхлээрэй.

Ингээд таны сэнс 3 ширхэг дугуйны голоо ашиглан нийт 2 үе солбисон хэлбэртэй байх ёстойг анхаараарай. Бэлэн болсон сэнсэндээ ямар ч хэлбэр дүрстэй рам буюу хүрээ хийж өгч болно. Гол нь өөртөө амар хялбараар гарын доорхи материалаар хийх хэрэгтэй. Сэнсийг унадаг дугуйны голоор хийхийн давуу тал нь өөртөө шарик болон арааг зэрэг агуулдаг учир хийх хөдөлмөрийг хөнгөвчилнө. Сэнсээ хүрээндээ бэхэлснийхээ дараа хүрээндээ жижиг хэмжээний цахилгаан моторыг араа шүдний хамт суурилуулах хэрэгтэй. Үүнийгээ сэнстэйгээ дугуйны гинжээр холбоно. Цахилгаан моторын хувьд ямар ч байж болно, гол нь танд амархан олдох бөгөөд төвөггүй эргэдэг байх ёстойг анхаараарай. Тоглоомон машины 1,5 вольтын мотор байсан ч болно, гэхдээ тун бага цахилгаан гаргах болов уу.

Мотороо сонгохдоо аль болох өөртөө тогтмол соронз агуулсан моторыг сонгох нь дээр. Цахилгаан мотор нь урвуу хувилбараараа цахилгаан үүсгүүр болдогийг та бүхэн 10 жилийн боловсролоос мэднэ гэж найдаж байна. Цахилгаан моторыг токонд залгавал эргэнэ. Эсрэгээрээ моторыг хурдтай эргүүлвэл өөрөө индүкцийн ток үйлдвэрлэдэг.

Жич: Дээрх салхин сэнсний загвар нь гарын доорхи материалаар хамгийн энгийн хувилбараар хийгдэх зорилготой. Хэрэв танд багахан хэмжээний физикийн мэдлэг, болоод илүү тохиромжтой материал байгаа бол дээрхи загварыг илүү сайжруулж болно.

Уг нийтлэлийг сэргээгдэх эрчим хүчний чиглэлээр суралцдаг оюутан миний бие Улаанбаатарчуудыгаа байгальдаа ээлтэй, дулаахан өвөлжихөд тус болох болов уу гэсэндээ нийтлэв.

Хэрэв танд боломж байвал

яаравчлан үүнийг хийж үзээрэй гэж хүсье. Монгол хүний оюуны потенциал дэлхийд дээгүүрт ордогийг дашрамд дурьдхад таатай байна.